大家好，我係BONNIE, 媽媽牌同盟外務副主席。 感謝 澳門母乳及育兒推廣協會 Macau Breastfeeding and Nurturing Promotion Association 邀請，我有幸能夠代表媽媽牌同盟第二次出席交流會，非常榮幸又非常滿足。 交流會資訊豐富，除咗幫我鞏固知識，協助有需要嘅母乳媽媽之外， 仲可以參考到其他國家對於推行母乳餵哺政策 (因為有講中國母乳庫 (milk bank)。 加入咗媽媽牌同盟做義工唔經唔覺都好幾年，除咗可以令我喺忙碌嘅工作同家庭生活騰出一個抖氣空間，做我想做嘅事之外，亦可以認識到一班志同道合嘅奶媽義工。 履行義工工作時，亦得到莫大嘅滿足感；遇上家庭同小孩子教養嘅難題同挫折時，有同路人嘅明白，係一種莫大嘅支持。
做呢度義工一個好重要嘅好處就係我可以帶埋一對仔女：浩麟同沁言，一齊做小義工，令我呢個在職媽媽可以做鐘意嘅事情， 同時間陪伴小朋友成長。 更重要嘅係我可以從中培養佢哋貢獻自己去幫助別人嘅修養，令佢哋明白，由裏到外都喺母乳嘅環境中長大有幾幸福呢！ 講到幸福，就一定要提吓辛酸事幫自己打下氣。想當年工人離職，有一個空窗期，無任何人喺我返工嘅時間，幫忙照顧小朋友，好感恩得到老闆嘅體諒，俾我帶住浩麟哥哥返工。浩麟哥哥喺我身邊喎，梗係全埋身啦，所以喺我工作上，無造成太大嘅影響，可以一邊工作，一邊埋身餵奶。我亦喺呢個時候可以掛泵，完全輕鬆晒！！ 另外，由於一齊返工，所以每日都唔需要趕住返屋企而願意留耐啲喺公司去完成工作。 雖然日日孭住好有斤両嘅浩麟返工，腰骨都有啲攰，但係呢段嘅日子，既可以返工，又可以阿仔係身邊，感覺真係好滿足！ 所以，無論係自己嘅工作或媽媽牌嘅義務工作，只要可以帶住沁言妹妹浩麟哥哥一齊去，一路聽講座一路埋身餵，真正做到 #行到邊餵到邊，其實只有對自己同工作有好處，令我更加相信當初堅持餵母乳係我最好嘅選擇！
Comentarios