top of page

穿桃紅母乳快閃Tee的隊友


睇到母乳快閃2017活動宣傳時,已經即刻想報名,我問老公一唔一齊參加,佢無乜所謂咁答「果日你生日,你話事,想去咪去囉!」當時心諗,死野肯定係懶得安排生日慶祝節目所以先應承,不過佢肯去我就已經好開心。


報名時睇到其中一項係問同行嘅參加者可唔可以幫手做義工,雖然驚驚地開口問老公會被拒絕,不過多個人去到幫手搬下物資執頭執尾喎⋯⋯

於是鼓起勇氣問老公可唔可以陪我一齊去順便做義工啦,佢一口就答應!咁就一齊去啦Go Go Go!!


快閃當日,笨笨嘅老公同我一齊著住桃紅色嘅快閃Tee、帶住bb一齊派汽球派傳單,雖然天氣都幾熱,但佢都表現得好樂意,見到一家大細、老公拖住大肚老婆經過,仲主動同d男士講要點樣支持老婆餵母乳添!就係咁,我地過左好開心嘅一個下晝!


以為咁就結束?非也!

自此以後,老公成日著住件快閃Tee落街,

去跑步、去會所、買宵夜,甚至星期日去飲茶都著!(我要聲明我唔係無買衫俾佢架!不過,係著得幾靚嘅,至少我睇得開心!)


呢件咁sharp嘅桃紅快閃tee,加埋「母乳快閃」大大隻字響背脊,實在太吸引途人目光,老公不但無覺得尷尬,反而好自豪添(仲成日以為人地覺得佢靚仔所以望佢)!


間中就會有住同一屋苑嘅住戶問佢乜野係母乳快閃、乜野係媽媽牌同盟、乜你地今日快閃咩、去邊度快閃呀等等嘅問題,笨笨嘅老公都有問有答,雖然有時答案係無厘頭到你聽到想打佢,例如:


路人:你地今日有快閃呀?
老公:大家閃完喇,我肥得滯走唔到啫⋯⋯

試過幾次有途人問阿女食邊隻奶粉咁高大咁白淨,笨笨老公都霸氣回應:「佢係食人奶架!」


有時聽到鄰居師奶阿嬸講食麥包、食麥皮會收奶,佢會忍唔住口話俾佢地知姓麥嘅係無辜架⋯⋯


剛剛嘅假日,老公又著左媽媽牌快閃Tee去飲茶,仲叫我一齊著添,帶b出街必著餵奶衫嘅小編,為咗方便邊飲茶邊埋身而婉拒左,老公反問:「(支持)媽媽牌咪就係我餵奶你當睇我唔到就得咩?!」(Okay!你岩!)


人奶路上,小編在不斷學習不斷努力,老公除左幫手砌泵、洗配件、雪奶、暖奶、餵奶,原來都默默地用心了解更多母乳知識,一齊進步緊!


或者你同小編一樣,一直以為身邊果位係豬隊友,但不妨細心留意一下,經你嘅潛移默化後,可能已經進化左!呢個世界又美好左!(至少多左人知道麥包同麥皮係無辜嘅~)


唔理身邊隊友有幾豬,為左 #將最好給最愛,大家都要繼續努力!加油啊!

Opmerkingen


bottom of page